Иқтидори энергетикиро ҳифз мекунем…

Бо мақсади пешгирӣ аз ҳолатҳои истифодаи беҳудаи нерӯи барқ ва дар ин самт тарғиби сарфаю сариштакорӣ, ки метавонад иқтидори энергетикии мамлакатро ҳифз намояд дар ҳама шаҳру ноҳияҳои вилояти Суғд ситоди корӣ ташкил ва таҳти роҳбарии кормандони мақомоти корҳои дохилӣ фаъолият мебаранд. Яке аз самтҳои онро дар баробари бурдани корҳои фаҳмонидадиҳӣ рӯёнидани қарз ва пардохти маблағи масрафшуда ташкил медиҳад.
Оид ба оқилонаву сарфакорона ва мақсаднок истофодабарии нерӯи барқ муроҷиатномаи ширкати саҳҳомии Барқи тоҷик вобаста ба тағйирёбии иқлим ва таъсири он ба истеҳсол ва интиқоли саривақтии қувваи барқ пешниҳоди аҳолӣ гардида буд. Вазъи баамаломада шаҳрвандон, роҳбарони корхонаву ташкилотҳоро водор месозад, ки барои расидан ба истиқлолияти энергетикӣ ва ҳифзи он ҳиссагузор бошанд. Шахсони воқеъӣ ва ҳуқуқиро зарур аст дар ҳолатҳое, ки бо дигар неруҳои гармидиҳӣ мумкин аст истифодаи барқро иваз намуд, ё ҷойи истифода аз таҷҳизотҳои баландшиддат барои истифода кардан аз технологияҳои каммасраф кӯшиш намоянд.

Фаъолияти дастаҷамъонаи ниҳодҳои давлатӣ ва сафарбар намудани гурӯҳҳои корӣ ба корхонаву ташкилот ва маҳаллаҳои аҳолинишин натиҷа медиҳад. Масалан дар Шуъбаи 1-и ВКД-и дар шаҳри Исфара 4 гурӯҳи корӣ созмон дода шуда, аз 10-уми декабр то 8-уми январ маблағи рӯёнидашуда аз ҳисоби қарздорӣ аз барқ зиёда аз 3 миллиону 700 ҳазор сомониро ташкил медиҳад. Дар ҳамин давра дар ноҳияи Мастчоҳ 4 гурӯҳи корӣ фаъолият бурда зиёда аз 2 770 000 сомонӣ маблағи қарзӣ барқарор карда шуд, дар шаҳри Гулистон бошад 7 гурӯҳи корӣ таъсис дода шуда наздик 2 500 000 сомонӣ маблағи қарзӣ ҷамъоварӣ гардид, ки асосан аз ҳисоби корхонаҳои саноатӣ мебошад.
Ин се шуъбаи мақомоти корҳои дохилӣ дар иҷрои талаботи барномаи давлатӣ, ки ҳадафи он таъмини истиқлолияти энергетикӣ мебошад фаъолияти пурсамар доранд.

Ҳамарӯза фаъолияти гурӯҳҳои корӣ таҳлилу ҷамъбаст ва барои натиҷабахшии фаъолият дастур дода мешавад. Имкониятҳои самараноки кор бо муштариёни барқ ва аз ҳисоби қарздорон рӯёнидани маблағ мавзӯи меҳварии ҷаласаҳои корӣ аст. Тавре аз натиҷаҳои корбарӣ бармеояд ҳолати худсарона пайваст намудани ноқилҳои барқӣ берун аз ҳисобкунаки барқӣ - яъне дуздии барқ низ ҷой дорад, ки барои бартараф намудани чунин ҳолатҳо гурӯҳҳои корӣ аз таъсиррасониҳои ҳуқуқӣ истифода мебаранд.

Акбар Шарифӣ, майори милитсия