Маҳфили шеър бо иштироки шоири форсзабони муқими Амрико Масъуди Сипанд

Бо мақсади огаҳӣ пайдо намудани ҳайати шахсӣ аз фарҳангу адабиёт ва каломи бадеъ пайваста дар мақомоти корҳои дохилӣ маҳфилу чорабиниҳои илмӣ-маърифатӣ доир мегардад. Чорабинии навбатие, ки бо иштироки шоири форсзабони муқими Амрико Масъуди Сипанд ва муовини Раиси анҷумани “Пайванд” Ҳусниддин Ғафуров дар толори маҷлисии ВКД баргузор гардид, ба ҳаёт ва эҷодиёти шоири ширинкалом, мутафаккири бузург, лисонулғайб Ҳофизи Шерозӣ бахшида шуда буд.
Маҳфили адабиро сардори Маркази матбуоти ВКД полковники милитсия Умарҷони Эмомалӣ оғоз бахшида, иштирокчиёни маҳфилро ба аҳли толор муаррифӣ намуд. Иброз гардид, ки Ҳофизшинос Масъуди Сипанд муаллифи шеъри “Ман ориёиям” таронаи ифодакунандаи руҳияи форснажодони олам буда, шеъри мазкур дар кишвари мо низ маҳбубияти хос касб намудааст.
Дар идомаи чорабинии фарҳангӣ шоир Масъуди Сипанд вобаста ба ашъори Ҳофизи Шерозӣ суханронӣ намуда, ғазалҳои Ҳофизро қироат ва тафсир намуд. Аҳли толор низ дар маҳфили адабӣ фаъолона иштирок намуда, доир ба ғазалёти Ҳофиз саволҳо пешниҳод намуданд. Меҳмонон ба саволҳои кормандони милитсия ҷавобҳои мушаххас гардонида, абёти пардапӯшонаи Ҳофизро ба аҳли толор равшан намуданд.

Барои болидарӯҳии иштирокчиёни маҳфил дар анҷоми чорабинӣ аз ҷониби ансамбли “Сипар”-и ВКД барноми консертӣ баргузор гардид.
Эҳсон Абдуллозода